أنـــــا "وعيال عمي "

[وليد بن علي]

تلبيتاً لموضع ابو سليمان"شفت مافيه موضوع قلت اشخبط "

أنا مدري يمكن فهمت موضوع أبو سليمان بشكل ثاني :dunno: وهو اني اشخبط عن أي شي يخص العائلة

وانا ابقول اللي عندي من وهي سواليف في داخل العائلة

اليوم ان شاء الله متواعدين أنا وعيال عمي(كلهم شباب غفالا)

نبي نطلع في استراحة من بعد المغرب وفيه لعب
كورة وقهوه وحلى(بس شارط على المعزب اليوم مايجيب من
حلويات ريناد...مليته:tooth: )..

المهم ابقولكم انه كلها شلة غفالا...أدري بعضكم
بلوغ يبغاني يعرف من هم الشباب:) ..طيب ابشر بسعدك...الشباب

( وليد بن علي الغفيلي" أنا " ، خالد الصالح الغفيلي ، يوسف الاحمد الغفيلي "راني:) "
مؤيد بن عبدالرحمن الغفيلي " العضو مـــؤيـــد " ، سليمان بن محمد الغفيلي " السيوف " ،
سليمان بن موسى الغفيلي " العزعوز " عصام بن عبدالله الغفيلي " أبو علي:D " عامر بن عبدالله الغفيلي
، تركي بن عبدالله الغفيلي " العضو تركي " أسامة بن محمد الغفيلي " مسكين مصخّن:S_013: "
عاطف بن عبدالرحمن الغفيلي " الغفيلي للحديد " )

هذه في الاصل كانت دورية صغيرة..وشوي شوي
حتى وصلنا العدد هذا..وهي في الأساس فكرة
من راني (حبيب يحب جمعات الغفالا) المهم قالي
وش رايك نطلع للشعيب (الكلام هذا قبل رمضان) قلت عساك على القوه..
قال خلاص وعدنا بكرا..قلت خلاص
وانا ابكلم سليمان المحمد وسليمان الموسى ومؤيد

المهم طلعنا وانبسطنا ذيك الليلة قلت اجل
الاسبوع الجاي عليّ وفعلاً طلعنا الاسبوع اللي بعده

(بس عصبوا علي:عصبت: بغو يضربوني لاني تأخرة عليهم)

وكان فيه زيادة من العيال خالد الصالح وعامر وعصام...

المهم العيال جازتلهم الطلعه وجمعة عيال
العم مع بعض...

واتفقنا على انها تصير دورية.....

وشي شوي حتى بعد تقريبا رابع دورية
دخل تركي معنا وبعد الدورية الخامسة او السادسة
دخل معنا اسامة وعماد
الغفيلي "الحديد"(ولد خالتي) لكن ظروف دراسة
في الخارج..خلته ينسحب من الدورية ويروح
لكندا:tears: ( تلقونه مسوي دورية مع مكسيكيين )
وقبل تقريبا شهر دخل معنا
عاطف(ولد عم عماد)والحين وصل
عددنا" 11.5 رأس " والدورية قابلة
للزيادة ونتشرف بأي غفيلي يدخل معنا...

وفيه مفاجأة في الأسبوعين الجايات
من أصحاب الدورية..لكن صبرو علينا شوي !!

واليوم مثل ماقلت نبي نطلع في استراحة
يعني نغير جو ونتحرك ونكسر روتين الدورية
وان شاء الله ابحاول أني اوثق لكم الطلعة بالصور:)



شباب بارزين في الدورية:

خالد الصالح : فاكهة الدورية

راني: المتحدث الرسمي

اسامة : الرجل الصامت

عصام : طير البر حقنا


واللي عنده أقتراح أو أفكار جديدة للدورية يطرحها هنا



شعارنا

"عيال عم وبس"

[حسام الغفيلي]

احسبون الاسبوع الجاي معاكم


ماشاء الله عليك يا وليد


تذكر ذيك الايام اول الدورية :):) شف ماشاء الله كيف صارت


الله يوفقكم يارب وعاد ننتظر صورك اذكر انك مهبول تصوير ومصور من درجة الفل اوبشن :)

يعطيكم الف عافية والله لا يهينكم


عيال عم وبس :)


سلم لي عليهم كلهم يا خلفهم

[مـــــؤيـــــد]

حركتات ياعيال .. دوريات من ورانا؟ < يقالي منب معهم :)

وأبو علي يعطي كل شخص مكانة.. وأنا؟ ياخي مالي رب.. :confused:
قل لو أمير الطلعة .. < مير ماتحب روحك أبد خخخخخخخخخ
وإلا زحلقني بأي لقب بس اهم شي اكون عضو صاحب مكانة

هالدورية من أروع الدوريات اللي مشيت فيها بحياتي

وقسم بالله إني اتمنى إنها مرتين بالاسبوع.. بس أخاف نمل من بعض .. وتخلص السواليف.. خخخخخخخخ


عسى الله لايفرقنا ويجمعنا على كل شي زين..

ابو علي .. اذا فيها تصوير بروح أحلق اللحين.. واشيل الذقن الخليجي خخخخ نبي نكشخ

الوعد الليلة ياعمي .. بس تراني بتأخر عشان الوالد الله يقومة بالسلامة ..
تقبل مروري خيو..

أخوك/مؤيد

[بنت الأصول]

يالله من قدكم يالغفالا

المفروض تطقونلنا رواق يالبنات ونكشت معكم >>>تمووون ههههههه

لا لا المفروض كل وحده تجي مع الي يقربونلها وتقهونا معاهم بس حضكم فيه أختبارات ولا تلاقين طابه معكم .>>>لزقه البنت هع هع

يالله بالتوفيق وبننتضر الصور خيو

ماننحرم منك ياولد العم

ونشالله تبنسطون والله لايفرقكم

مرسي

[جودي]

الله يوفقكم يارب ويجمعكم ع الخير والمحبه


من جد شئ يفرح القلب


الف شكر اخوي وليد

[الــوافــي]

واوووووووووووووووو


اقول وليد بن علي جايكم انشاء الله


الاسبوع الجاي انا وحسام

لاتنسونا وراكم وراكم


ماشاء الله عليكم والله فرحتنا ياوليد بن علي


الوافي المجروح

[وليد بن علي]

حساموووووه

يابعدي والله مشتاقييين لك

وياليت بعد تجي وتزين الجلسة معنا

اشكرك من :قلب: على مرورك



مــــؤيــــد

ياأمير الجلسة:ongue: مكانك في :قلب:

شكراً على مرورك


دلوعة أهلها

اشوى ان فيها اختبارات ولا كان ماسلمنا :)
>>>>>أمزح


جودي

اشكرك على مرورك


الواااااااااافي المجروح

عساك على القوه انت وحسامووووه

وانت اللي فرحتنا بمرورك

اشكرك بعنف

[عبدالله سليمان العلي]

هلا ابو علي

مثل ماعودتنا على الموضيع اللي تشرح الصدر وتفرح اللي مايفرح


ياحبي لكم ولدوريتكم << يقول يازين من تردد عليه من الرياض لرس علشانكم وعلشان نشوف عيال العم ونتعرف عليهم

يازين الاجتماعات زيناه

ولعب كوره << يقول تبارون حقين دوريه الرياض خخخخخخ

مشاء الله عندنا وعندكم خير

حنا دوريتنا كل احد الصراحه مالي شهر داخل معهم بس ماحلفتون اني متحسف على الايام اللي راحت ولا دخلت معهم


الله يوفقكم ان شاء الله وعقبال ماتعزمونا ههههههه


تسلم يالغالي ابو علي على الموضوع الرائع وعقبال مايكثرون ان شاء الله

** ارجو من الشباب اللي بالرس او الرياض يلحق على مثل هذي الاجتماعات لمعرفه عيال العم وغيره **

الشي اللي مايعرفه الكثير من شباب الغفيلي عن الاجتماعات هذي؟؟

الرسميه وحركات العزايم مافيه ابد

سولف مع اللي جنبك علشان تعرفه مافيه

لو انك اكبر انسان فيك حياء ان ينطلق لسانك

ناس تصير ماتعرفهم الى لك اسبوعين تقل عايش معهم طول عمرك

الصراحه ودي امسح اللي كتبته لاني احس اني ماوصفت الوصف الكامل لانه لو الواحد يحضر ويشوف يبي يقول ماوصف شي هذ


تقبل مروري ابو علي

وتسلم على الطرح الررررررررررهيب يارررررررهيب

[وليد بن علي]

يابو سليمان

تحية خااااص لك..واتمنى نشوف في أقرب فرصة

وأشكرك على مرورك

[تركي الغفيلي]

:) يا سلام ابو علي :)


الله لا يخلينا انت الامير حقنا


وانشاء الله راح نستمر بها الدوريه :confused: ونبغى زياده


وحسام والوافي والله نتمنى انكم معنى

:clap:

بس صور لا :blushing: اخاف من العين

نزل لهم صور للهندي الي لعب معنى :بوكس: مصارع مهب لاعب


يسلموووو ابو علي

[وليد بن علي]

أخبار الطلعة في الاستراحة بالتفصيل

والله واقولكم رحت للأستراحة وكان موعدنا في استراحة ابو اياد...
وصلت أول واحد واتصل على هذا وذاك وكلهم يقولون يالله
هذانا بالطريق"نصابين" واتصل على اسامة...ويمرمطبي شوي..
والله يابو علي ماقدر اجي أنا الحين محجوز بالحجز.."وانهبل انا":yikes3:..المهم
قال لالا هذا عند باب الأستراحة ( والله كفو يابو محمد تعبان وجاي
علشان عيال عمه..لا وبعد لعب كورة معنا...ماشاء الله عليه)...

المهم ونجلس ننصب على بعض أنا وياه...والله وهذا راني
وعصام يدخلووون..والمعزب مابعد جاء(تراه مهب تركي المعزب:) )
المهم ونجلس نسولف والله وهذا تركي يدخل يسحب رجوله
ومتسبح من الشاهي:) (المسكين منكب عليه الشاهي:ساعدوني: )
والله ونفله مع القهوه والحلا..(شولاته بلجيكي،وكيك شغل بيت)..
ويدخل عامر (الله يعطيه العافية جاي وعنده بكرا اختبار)
ويدخل بعده سليمان المحمد ويتقهوى...ونقوم نصلي وبعد
ماصلينا طبينا في الملعب..

يالله انتم وحنا(راني ، اسامة ، عصام + البنقالي )
وحنا (أنا ، عامر ، تركي + البنقالي الثاني )
والله ونبدأ اللعب ونهستربهم :clap: المهم لعبنا بس
بصراحه تعبنا:00014: ..مو أي تعب ويخلص الشوط الاول...

ويجي مؤيد وسليمان الموسى...وعامر استأذن يبي يروح
يدرس (الله يوفقه ان شاء الله) وننزل بالملعب ويجي معنا
"سليمان الموسى" ومعهم "مؤيد" (والله ابدع مؤيد في المرمى)
ونلعب الشوط الثاني وتبون الصدق والله انهم هستروبنا في بداية
الشوط الثاني...

لكن على قولهم قدم الغشيم وألحقه:D والله ويتقدمون
علينا 7 - 4 ونرتب الصفوف ونخليهم مايتعدون 7 وخذ لعب
حتى انتهت المبارات 10 - 7 لنا:فزت: :فزت:

خلصنا من المبارات وجلسنا ننتظر العشاء...
والله شوي ويوصل العشاء من بيت أم تركي ( الله يعطيها العافية على العشاء )

>>>يعز أكل البيت:tooth:

والله وتعشينا وغسلنا وجلسنا نسولف ونضحك ونعلق
على بعض . بصراحة الطلعة اليوم غييييييير

طرائف الاجتماع :

* العمال اول شي رفضو يلعبون معنا..قالو تعطوننا من العشاء...قلنا اوكي
* مؤيد المسكين اليوم عجزت يتكلم..كل مابدأ بسالفة قام واحد
من العيال وقاطعه..وحاس سالفته.
* فيه أثنين بالملعب بغيت اخلطهم: "تركي"علشانه مغرور
مايناول.."راني"علشانه يشوت بقوه على الحارس
المسكين (سليمان المحمد) .


هذه تفاصيل طلعة الأستراحة...وماعليش مافيها صور:dunno:
لكن أن شاء الله القادم أجمل وأحلى

وآسف على الاطالة

[تركي الغفيلي]

:ongue: ابو علي ياخي لا تطنز ويبلاك ربي


والله اني عجزت اجلس من الحراره بس مسوي قوي قدامكم وكني ما تعورت :nosweat:


بعدين تراهم المبارة الاولى هكو علينا اخذو البنقالي الي يعرف يلعب:confused: كلهم كمخ بس الثاني المسكين ما يعرف يركض رجوله متخانقه

بعدين انا مغرور ياخي تروح بالزاويه وتبي كور تجيك:bomb:

:) <<< زيدان وانا ما ادري


بس اهم شي قلت لراني منتب فايز ولا فاز :clap:

[مـــــؤيـــــد]

هههههههههههههههههههه

أبدعت انا اجل بالمرمى.. .؟؟
انا لو ربي يفكن من البقطه تركي كان ماسجلتوا ولا هدف.. بس هستر بي بالارضيات وقسسسسسسسسسسم جتن الصيحه.. اللحين 40 سنه تتن وبلوت وحراسة مرمى وتركي يهستر بي بالأرضيات < وش عنده 40 سنه تتن وبلوت = هيط×هيط

والله اليوم الطلعه وناسه لولا مقاطع الهرج.. اللي فوق 5 سوالف بقولهن وكلهن يقاطعونني ماادري ليش :(

بس صدق.. نقصنا اليوم ابو صالح.. فقدتك ياابو صالح.. فقدتك يااعز الناس فقدت الحب والطيبه :blushing: وانا من لي بهالدنيا سواك ان طالت الغيبه < حشى صارت ام صالح مهوب ابو صالح على ذا الهرج هههههههههههه

أبو علي.. عز الله من الاسبوع الجاي مانتب شايف الا ثقل × ثقل.. من العيال.. دام الفضايح بتجي هنا كلن يبي يهجد.. تعرف مااحد منا اعرس :blushing:

ابو علي يسلمو على ذا الموضوع .. وتركي شغله عندي بالمبارايات الجايه ((تمصيع))

أخوكم / مؤيد الدعيع

[الــوافــي]

ههههههههههههههههههههههههههه


ياحبيلكم بس ياليتني معكم ماشاء الله عليكم


وليد بن علي يعطيك الف عافيه يالغالي


الوافي المجروح

[عباس الغفيلي]

ماشاء الله عليكم ,, يايبو علي عيني عليكم باردة ,, انواع الوناشَة ,, ناقصها صور بالكاميرا الجديدة مو المنكسرة ,,:)

تدرون ليه مؤيّد الدعيع ,, يقاطعونه الشباب ,, إذا هرج:S_023:

لأنه الله يهديه ويخلّيه لعين ترجيه ,, يمطّ لك السالفة عشرة كيلو وهي ما تسوا خمسة سنتميتر ,,

الله الله بالأختصارات ياولد عمّي ترانا بعصر السرعة ,,


مع تحيات : عبّــــــــــــاس:icon30: الغفيلي ,,

[غلا]

:)

:)

اهم شي ابو علي الكنافة افا بس افا ليش ما جبتها :)

بس يحق لك شوكولاه بلجيكي عندك ريناد كلها >> بتحسدكم على ريناد :)

والله وناسة ماشاء الله عليكم

كفو تروك كفو عقبال ما اشوفك سامي الجابر حق الهلال :)

الله يجمعكم دوم يارب ويخليكم لبعضكم

وخلوكم كذا دايم ولو تكبر الدورية يصير احسن بعد

عالاقل العوض ولا القطيعه

لو مايصير للغفالا الا اجتماعات الرجال

شنسوي بالحريم ياللي ماحدا راضي يحكي بالموضوع


يسلمو ابو علي

ماتقصر

اشواقي

[ياسر بن عبدالله]

بوسه على خشمك يالذيب
وتسلملي على كذا تجمعات

والله يتمم وتستمر ولا ينقطعون عيال العم من بعض يارب

[حسام الغفيلي]

الا تركي ما عليه اختبارات :)

[الشاطر]

أهلين بولد خالتي وليد بن علي

والله تحمست لطلعتكم شكلي أبكثير جياتي لرس عشان أشاركم

ماشاءالله عليك أسست دورية شباب الغفيلي بالرس

وصول ماشاءالله عليك

أتمنى بأن يوصل سلامي لأعضاء الدورية شباب الغفيلي بالرس

تحياتي لك
الشاطر..

[Just - 4 - you]

عيال الغفالا مجمعين .. كنت اتمنى اطلع معكم .. بس ..

.. لله يسعدكم بهاي اطلعه ..

[The Princess]

اجتمــــــــاع شباب غفالا الرس

بصرااااحة شئ يفرح القلب

الله يوفقكم وخصوصا العقل المدبر للدورية !!

والله يعطيكم طولة العمــــــر على حرصكم على صلة الرحم ..