الفتاة بعد الملكة وقبل حفل الزواج ...

[حزن وفرح]

الفتاة بعد الانتهاء من عقد الزواج وقبل حفل الزواج هل تكون ملك زوجها أم تكون لأهلها ؟؟!!

صراحة شدني الموضوع في أحد المجالس الشبابية وقلت بما أن موضوع يستحق الاستماع إلى أراء الآخرين

لازم نتحاور ونشوف رأي الأعضاء من خلال هالموضوع

طبعا الموضوع يتكلم عن البنت بعد ما تنتهي من عقد النكاح وتصير زوجه بشكل رسمي

طبعا من المعروف والسائد ان تكون هناك فترة غير محددة بين حفل الزواج و الملكة

انا اتكلم عن هالفترة هذي هل الزوج يقدر يطلع معها أو يكلمها أو..... إلخ أو انه ممنوع منها حتى يحين يوم الزواج ( الدخلة ) .

رأيي أنا من هالنقطة هذي راح أقوله ولكن بعد ما أشوف أرائكم

خصوصا أن هالقضية منتشرة بشكل كبير في مجتمعنا السعودي ويمكن الخليجي ... >>>> لاحظ اني ما قلت رايي لسا لحد ينط ويعتبرني قلت رايي او شي


اتمنى اشوف ارائكم ومبرراتك ووجهات نظركم في الموضوع

مع فائق التحية والاحترام

حزن وفرح ،،،

[رساويه مملوحه]

هلا والله حزن وفرح

يعطيك العافيه اخوي

تفاعلا مني معك بهالموضوع .. أنه من حقه يكلمها ويشوفها بس بحدود المعقول بعد الملكه .. يعني مافيها شي اذا ملُك عليها أنه يشوفها الى ان يحين موعد الــزواج .. صراحه هذا يعني كلامي من مجتمعي اللي اشوفه .. وغير كذا يرجع لراي الاهل ممكن يكونون معارضين يعني يشوفوا انه حاجه مو حلوه او فيه عيب ..

الله يحفظك

سلامي لك

[انس محمد]

من ناحيه شرعيه هي زوجته ويحق له

من ناحيه اجتماعيه تختلف المجتمعات كثير من الناس خصوصا كبار السن غير مؤيدين للفكره هذي اطلاقا انه تطلع معه او انه تكثر المكالمات ....لكن ضروري انه يكلمه قبل العرس يشوف هي وشي ؟؟ عاد حسب خبراته وقصصه البوليسيه يحدد هي من اي صنف !!ويشوفه كم مره يعني ويدقق بالشوفه لاتصير مغشوشه يعني العيون عدسات ونت جاي انتم ادر بعد... وبعدين هذي عشره عمر من وجهة نضري ودي اشوفه وقعد معه ونطلع سوا ون حصل اهج به يكون ازين نسوي فلم مصري
الله يسهل ويزوجنا انشاء الله

[الغفيلي اكسبرس]

طيب يالذيب ياحقرص بقرص وإذا شاف إنها ماهي من مستوى تفكيره أو عيونها على قولتك فيها شي أو مركبه عدسات مايقدر يغير شي لأنهم تملكو وخلصو التفكير اللي يكون بينهم في هالمرحله تكون في مابعد الزواج وأنا أقول
هي تحل له وهو يحل لها
بس المفهوم والمتعارف عليه والغالب بين الناس هالحين إنه ممنوع يطلع مع البنت لاكن يجي للبيت يشوفها يسولف معها يتقهوى هو وإياها يكلمها بالتليفون لاكن مستحيل يطلع معها وهذا أنا أؤيده لأنه يمكن يطلع معها ويحصل مايحصل وكم مره على كذا وإذا جاء الزواج يقول لا ماأبيها هي لعبه هي غنمه من سوق الغنم (مع احترامي لكن) أبيها ماأبيها
الواحد إذا تملك المفروض يكلمها بالتليفون بس حت مايشوفها إلا ليلة الزواج عشان كل واحد يشتاق للثاني مهب يصيرون مالين من بعض وهذا رأيي الشخصي أنا أقول رأيي الشخصي
الله يزوجنا وبعدين نفكر وش نسوى المهم هالحين ندور بنت الحلال وبعدين فيها حلال

آسف جدا للإطاله
وألف مليون شكر لكاتب الموضوع
ودمتم بعافيه
الغفيلي اكسبرس

[غلا]

استاذ حزن وفرح

من رايي انه البنت بالفترة هذي تكون ملك مين ؟ .. تكون ملك نفسها يعني هي تحكم نفسها وبس

يعني لا اهلها ولا زوجها هي وبس لانها لا تتبع الاهل ولا الزوج

وبالنسبة لفترة الملكة اكيد لازم يكلمها ولازم يتعرفون على بعض اكثر عاد يطلع معها مايطلع حسب الاهل وحسب البنت بعد يمكن ماتبي

لكن بالشرع اساسا هي زوجة له خلاص لكن التقاليد هي الي حطت الفترة هذي

الغفيلي اكسبرس اذا الواحد اكتشف حاجة بالطرف الاخر مو عاجبته اكيد راح يلحق يسوي شي حتى لو كان متملك المهم مايعيش حياته مع احد مو مقتنع فيه بالمرة

استاذ حزن وفرح مشكور عالموضوع مع اننا صغار عليه لكن حبيت اقول رايي

[حزن وفرح]

طيب اوكي شاكر للجميع وجهات النظر المطروحه

بالنسبه لي انا اقول

طبعا بعد الملكه تصبح زوجته وله حق التصرف فيها وهذا لا جدال فيه ابدا ابدا ابدا


ولكن انا ضد فكرة انه يطلع معها قبل حفل الزواج لعدة اسباب بقولها وهي طبعا من وجة نظري المتواضعه

اول شي تجنبا لحكي الناس يعني فرضا لو حد شافها وعرفها وما يدري عن سالفة الملكه شف وش بينقال عنها

ثانيا انو الشيطان شاطر صح انها زوجته بس يعني لا قدر لو صار شي مثلا بينهم وصار وتوفى الزوج قبل الحفل>>>> احتمال كبير يقولون اهل الزوج احنا ولدنا ما بعملش الحاقات دي >> قلبت مصري بس ما عليه نرجع

فا تبلش الحين البنت يعني بتصير خلافات وقال وقيل ومشكله يعني بحفل الزواج اشهار لكل العالم ان فلانه زوجة فلان واي شي يصير بينهم يكون في اطار واضح

ثالثا انو لو طلع معها وزي كذا وربي تفقد جمال ليلة الدخله يعني ما احلى ان تجيك البنت زي ما يقولون مغلفه بالورود ومتشوق لها يعني صدقني بتكون ليلة من ليالي العمر الي ما تنسى على عكس لو كنت كل يوم تشوفها ومال من خشتها فا يعني هذي وجهة نظري في المنع

انا اقول انو يعني يعني ممكن يكلمها بالتلفون وبعلم اهلها طبعا عشان بعض الامور الضروريه بس ما يصير نشبه ولزقه كل ابو شوي ناط وداق

تظل هذي وجة نظر

واختلاف الراي لا يفسد للود قضيه

اضاءه اخيره

يالغاليه غلا فعلا الانسان ملك نفسه مو لاحد ثاني بس يعني انا اقصد انو مسؤوليتها على من في هذي الفتره بس يمكن خاني التعبير شوي

شاكر لك توضيحك يالغلا

[كاتم العبرات]

هلا اخوي حزن

من ناحيه شرعيه زوجته ويحق له كل شي

وانا اؤيد كلام اخوي حقرص بقرص

دمت بخير

[غفيلية وافتخر]

وإذا جاء الزواج يقول لا ماأبيها هي لعبه هي غنمه من سوق الغنم (مع احترامي لكن) أبيها ماأبيها


اولا احب اعلق على كلامك اخوي اكسبريس

افا عليك وش غنم ماغنم ياخي زوجته من خحقه يسوي فيها الي يبي

بس على قوله الاخوان انو في عادات وتقاليد عندنا ولازم نحترمها

لكن ماتاصل انو يقول انها غنمه من سوق الغنم :mad:

لانها ملكه وصراحه تذكرت قبل كم سنه كانو البنات يعطون نصائح للي بتتزوج ويوقولون لها لاتكلمينه واثقلي حتى رسايل لاتراسلين يمكن بكرى يقول هذي تكلمني اكيد تكلم غيري :p مهب صاحيات البنات ابوكم زوجته لو كلمته مافيها اي غبار او شي يمس الدين و الاخلاق ;)

حزن و فرح اشكرك دائما ماتطرح مواضيع رائعه ومفيده

بصراحه انا اقول ان البنت تكون ملك ابيها مع طبعا احقية التصرف من زوجها اذاا كان يكلمها فهو يقدر يمنعها من اي شي لكن هي ملك ابيها لانها مازالت في بيته و تحت رعايته والا كان صارن البنات ملطشه ذيك الفتره ومهيتات

انا مع ان البنت تكلمه فترة الملكه وتقابله لكن بحدود المعقول مو عشان شي

الا بس لكي يكون لليلة الدخله طعم غير ويكون الرجل فعلا مشتاق يشوف الي يكلمها ويتمقل فيها على كيفه

وفعلا الطلعات احسها مالها داعي الا للضروره و الضروره القصوى فقط لانها هي مملكه لكن لم تعلن عن الزواج يعني الناس يبون الشر باي مكان وممكن يطلعون عن البنت او الولد كلام يتم ملاحقهم طول العمر من هرج الناس

عشان كذا لازم نراعي المجتمع و تقاليده :)

تقبل تقديري اخوي حزن و فرح

[سارا]

ايه من ناحيتي
<<اسكتي بس
خله يجي يسلم عليه ويسولف معها له حق بعد زوجته <<طبعا بعد الملكه
اما تطس معاها اها بس<<وجه نضررري
ومشكوور

[حزن وفرح]

كاتم العبرات

غفيليه وافتخر

مصقوعه بقدر



شاكر لكم مشاركتكم

واسعدني رؤية وجهات نظركم