المساعد الشخصي الرقمي

مشاهدة النسخة كاملة : طفولة معاق

فتون علف
02-13-2005, 07:31 PM
قصيدة للشاعر محمد عويضه ...

تعبر عن واقع المعاق في مجتمعنا...

قصيدة محزنه ومؤثره :( ...


========================
أالطفوله ..

أحلى مافي هالحياه

مرحله من غير هم

كنـّا دايم نبتسم

كنـّا حتى لو بكينا ... وجارت الدنيا علينا

بعد لحظـات وثواني ...

بسمه فينا ترتســم

كنـّا نركض خلف كوره ... لا لا أنا ماكنت معهم؟

وحدي بس بعيد عنهم ... كنت أضحك من ضحكهم ...

جالس لحالي أهذري... جالس أحسب كم( كوبري )...

صلـّحه( أحمد ) في ( ماجد ) ؟؟

والله واجد!!

وقبل ما يحل الظلام ...

للبيوت نروح نجري ... لا لا أنا ماكنت معهم !

أمشي وحدي بعيد عنهم ... أمشي وأعدد أثرهم!

وهم عني يبعدون ...

يبعدون ... يبعدون ...

إلا( ماجد )!

كان مثلي حيل ضايق ...

بس حزنـي كــان حارق

كان يسألني ببراءه : ...

ليش تعرج ؟ ... قلت مادري ! - باستياء -

ليش تبكي ؟ قلت مابكي - بكبرياء -

ضاق مني ...

ثم سألني في غباء ...

قال ( وثرايك تـثــابق )؟

وراح عنــّــي ... !!


****************************

كنت أسأل دوم نفسي ...

ليش ما أركض معاهم ؟؟

ليش دوم أمشي وراهم ؟؟

وش بلاي ؟؟ أو وش بلاهم ؟؟

ليه أنا غير الأنام ؟؟
زاحمتني الأسئله...

كل شيٍ أجهله ؟

وإن تعبت من الإجـــابه...

أحظن الحيـــره وأنام .


*****************************

مرّت سنين وكبرت ...

صار همّي اليوم أكبر

حتى دمعي صار أكثر

للأسف توي قدرت ...

أفهم إني شخص ( عاجز )!

يعني بيني وبينكم

مليون حاجـــز !!!

صدقوني ذي حقيقه ...

لا طلعت السوق ... كل مامشي دقيقه

القى كل شوي أبله !

يمشي ويناظر صديقه ...

ويغمز له

يقول : ناظر...!

وش يناظر ؟؟

وتتفجّــر في خفوقي
ألف ضيقه

ووحده في وسط الزحام ...

طالعتني باهتمام ...

بنت في عمر الزهور ... أي رشاقه ... وأي أناقه ...

وأي عطـــور !!

قلت في نفسي ياهووووه

هي تناظرني بغرام ؟ أو هي نظره والسلام ؟

بس أكيد إنها تعرفني ... شايفتني ؟

شايفتني في جريده ؟

واعجبتها لي قصيده ؟

إيييييه أنا توي افتكرت ...

لي قصيده ...
كنت ناشر معها صوره

بس صوره ... ياسلااااا م

وفاجأتني ...

لمـّا صارت لي قريبه ... كانت تـتمـتم بطيبه

( يكسر الخاطــر حـــرااااام ) !!!!!

وتركت دمعه غريبه ...

وضاعت بوسط الزحــام

دمعه كانت تحكي وضعي ... زلزلتني

ارتطم قلبي بضلعي ... دمرتني

صدقوني ...

أصعب اللحظــات وأقسى

لاغدا الرجـّــــال يكسر ... خاطر انثى

كيف ينسى ؟؟؟

جاوبوني !

******************************

وزاد همّــي ...

يوم فكــّـرت بوظيفه ... ثم زواج

أي وظيفه ... وأي زواج ؟؟

اللــي مثـلي ...

مهما طالب ... لويلف ولو يدور

زين لو حطـــّــوه كــاتب

لا ... وعلى بنــد الأجـــــــور ...

ماهو رسمي !!!

صدقوني لو تدرّج ... وصار راتبه يتصاعد

وابتــدا وضعه يزين

ما أظنه بيتزوّج ... إلا من بعد التقاعد

من سنه الى سنتين !


******************************

وفي النهــايه ...

يابلــدنا... مهما كانت تسميتـنا

عاجزين ... معوّقين

لك عهدنا... وذا قسمنا:

أقسم بالله العظيم ... منزل الذكر الحكيم

أن أصونــك يابلادي ... من شرور العابثين

من مطامع كل حاسد ... من نوايا كل فاســد

وإني لك حصن ٍ حصين

إنتي ناديني وشوفي ... لا نويتي بالجهــاد

والله أقهر لك ظروفي ... دامك إنتي لي بــــلاد

وباسم كل العاجزين ...

دام فينا أصبع يطول الزنـــاد

لا يهمــّـك يابلادي ...

وازهليهــــــــا.

ــــــــــــــــــــــــــــــــــــــ




تحيــــــاتي...

بنت علف :cool:
علي اليامي
02-13-2005, 07:45 PM
يسلمو

فتووون علف

من جد قصيده محزنه

يعطيك العافيه على الاختيار

واحسن شي سويتيه شلتى التوقيع :p
غفيلية وافتخر
02-13-2005, 07:48 PM
رووووووووووووووعه فتون
ماشالله ذواقه مادرينا عنك
اخت اخوها
02-13-2005, 08:36 PM
مشكووووره فتووو .. :o

وبعد اذنك .. بحط القصيده..

للاستمــــاع (http://www.6rbtop.com/downram.php?song_id=19866&type=au&q=hi)

للحفـــظ (http://www.6rbtop.com/download.php?song_id=19866&type=au&q=hi)
حزن وفرح
02-14-2005, 07:09 AM
يسلموووووووووووو فتون

اختيار وذوق رائع

ونبي شوف اكثر عاد من هالابداع والتميز الي عندك ;)
حسام الغفيلي
02-14-2005, 06:09 PM
مشكوووووووووووورة اختي فتووووووووووو

واول مرة تنزلي موضووووووووع حلو
فتون علف
02-15-2005, 09:26 PM
مشكورين جميعا على الردود..

وياعساني ماانحرم منكم ومن آرائكم :rolleyes: ..


ولد الغفيلي...
لااااااتعليق :mad: ..
كيفي غفيلية
02-16-2005, 09:17 PM
فتون وش الزين حلوه وحزينه

ويكفي انها نازله باسمك يعني احسن شي :rolleyes:
مهند
02-17-2005, 02:56 PM
شوكوووووورن

فتوو >>>> مو اقل من روعة


أصعب اللحظــات وأقسى

لاغدا الرجـّــــال يكسر ... خاطر انثى

كيف ينسى ؟؟؟

جاوبوني !


من جد تحز بالخاطر ,, وعموما الكلام كله مؤثر مو بس هالمقطع ,,

لكن ماظنيت ان كل من هم بوضعه هذا حالهم ,,

كما ان المجتمع ليس سوا من حيث التعامل مع الغالين على قلوبنا ,,



أسأل الله العلي القدير ان يعوظهم خيرا ,,

كما احمد الله عزوجل على كل حال,,




*** فتوو ,,

والله وبكيتينا .. الله لا يحرمنا من حضورك وإبداعك , وانا بصراحة اتوقع منك

اكثر من هذا... لكن جبتيها انتي,, والاخت قبلك بقصيدة الظفيري للام